• Александар Ковачев
Фудбалерите на Севиља, во рамките на 5. коло од Лига Европа на гостински терен се поразени од Стандард Лиеж со 1-0 (1-0), па во последното коло ќе мора да слават победа против Краснодар, доколку сакаат да обезбедат место во елиминационата фаза.
Стрелец на победничкиот гол за Белгијците беше Џенепо во 62. минута, а последните 25 минути гостите ги одиграа со играч помалку по исклучувањето на Пабло Сарабија.
Дуелот во групата И меѓу Малмо и Генк заврши 2-2, додека тимот на Бешикташ со голот на Ленс во 90. минута направи комплетен пресврт и по негативата од 2-0, на крајот славеше со 2-3. Мечот во Норвешка повторно го одбележа Лорис Кариус, кој најпрво беше лобуван од 40 метри, а потоа „заплива“ во празно и ќе беше еден од главните виновници доколку Бешикташ загубеше.
Во групата Х, во која од претходно се познати патниците во елиминационата фаза, Аполон го совлада десеткуваниот тим на Лацио со 2-0, додека тимот на Ајнтрахт Франкфурт на домашен терен славеше против Олимик Марсеј со 4-0.
Повторно нова блескава партија за германскиот тим одигра Лука Јовиќ, кој погоди по само 56 секунди игра, а во продолжение најпрво Луиз Густаво, а потоа и Митроглу ја погодија сопствената мрежа и донесоа високи 3-0 за Ајнтрахт против Олимпик Марсеј. Конечните 4-0 ги постави Лука Јовиќ во 67. минута.
