• Саше Љолес
Екипата на Севиља на убедлив начин успеа да дојде до втората сезонска победа во Примера и славеше со сигурни 5-1 над Алмерија. По лошиот старт, андалузискиот тим малку го поправи впечатокот и сега се искачува неколку позиции погоре на табелата.
Убедливиот триумф беше најавен уште во првото полувреме, а стрелци на головите беа Ел Несири, Лукебакио и Сусо. Севиља имаше голема позитива и на паузата резултатот беше 3-0.
- Извештај од натпреварот:
Вторите 45 минути донесоа слична слика на теренот, домашните продолжија со одличниот ритам и постигнаа четврт гол, овој пат преку малку подзаборавениот Ерик Ламела. Аргентинецот стрелаше прецизно по само шест минути игра во вториот дел, а гостите потоа успеаја да извлечат пенал, кој го реализираше Колумбиецот Суарез во 71. минута од натпреварот. Момчињата на Хозе Луис Мендилибар не дозволија овој гол премногу да ги „разниша“, а печатот на големата победа дојде во 92. минута, кога Кике Салас ги постави конечните 5-1.
Освојувачот на минатогодишната Лига Европа сега има вкупно седум бода, доволни за единаесеттата позиција на табелата во Примера. Во следното коло Севиља ќе има исклучително тешко гостување кај каталонскиот гигант, Барселона.
