Екипата на Селтик го издржа притисокот на „Ајброкс“ и на јапонски погон се избори за важен бод против големиот ривал Глазгов Ренџерс. „Зелено-белите“ имаа водство, но потоа се разбуди домаќинот и со два брзи гола направи пресврт. Сепак, кога на трибините се пееше победничка песна, најдобриот стрелец во шкотскиот шампионат, Фурухаши погоди за реми на шампионот на теренот кај лутиот ривал (2-2).
Навивачите на „Олд Фирм“ имаа можност да уживаат во текот на 2022 година, а најголемото шкотско и едно од најжешките светски дерби ќе започне во 2023 година. Во годината зад нас, гигантите од Глазгов се сретнаа четири пати во првенството, а Селтик славеше во три наврати (во септември дури со 4-0), додека еднаш беше нерешено (1-1). Тие одиграа и натпревар во полуфиналето на ФА Купот, па иако Келтите поведоа на „Хемпден Парк“, ривалот се радуваше по продолженијата.
