• Мартин Танасковски
Фудбалерите на Рен приредија големо изненадување во 22. коло од Лига 1, совладувајќи го актуелниот шампион Пари Сен Жермен со 3-1 на „Роазон Парк“. И покрај турбуленциите во клубот и серијата од четири порази, бретонскиот состав одигра храбро и дисциплинирано, покажувајќи дека на домашен терен знае да биде исклучително незгоден ривал.
- Извештај од натпреварот:
По заминувањето на тренерот Хабиб Беје, тимот го предводеше Себастијан Тамбуре како привремено решение, но тоа не се почувствува на теренот. Без неколку важни играчи во составот, Рен сепак излезе со јасна идеја, агресивна игра и брзи транзиции против еден од најмоќните тимови во Европа.
Натпреварот започна со силен ритам. Веќе во шестата минута Лепол се закани со одличен удар од движење кој заврши во стативата од голот што го бранеше Сафонов. Парижани возвратија преку Дуe и Кварацхелија, но и покрај теренската иницијатива, недостасуваше конкретна завршница. Во 34. минута следеше моментот што го смени текот на средбата. По одлична асистенција од Махамаду Нагида, Муса Ал Тамари со вешта финта го измести својот чувар и со силен удар со левата нога ја затресе мрежата за водство на домаќините. До крајот на првото полувреме гостите се обидуваа со бројни нафрлувања, но голманот Самба беше сигурен меѓу стативите.
Во вториот дел Рен продолжи со самоуверена игра. Во 69. минута Шимански изведе прецизен корнер од левата страна, а Лепол со моќен удар со глава зголеми на 2-0, носејќи ерупција на трибините. Сепак, реакцијата на парижани беше брза. Само три минути подоцна, по центаршут на Хакими, Дембеле ја искористи невнимателноста во одбраната и намали на 2-1, навестувајќи драматична завршница. Следуваа моменти на силен притисок од гостите. Мендеш и Рамош се најдоа во добри позиции, а Баркола пропушти извонредна шанса за израмнување. Сепак, додека Пари Сен Жермен се обидуваше да стигне до бод, остави простор за контранапади.
Токму тоа го искористи Рен. По загубена топка на средината од Канг Ин-Ли, резервистите изведоа брза акција, Блас асистираше, а Емболо со необичен, но ефективен погодок ги постави конечните 3-1. Овој триумф може значително да влијае врз борбата за врвот, бидејќи Ланс добива можност со победа во своето гостување да ја преземе лидерската позиција на табелата.
