• Саше Љолес
Реал Мадрид се огласи по денешната објава на Европската фудбалска унија (УЕФА) во врска со таканаречениот „случај Негреира“, при што шпанскиот гигант побара истрагата за исплатите од Барселона кон поранешниот потпретседател на Техничкиот комитет на судии да продолжи со забрзано темпо.
Во своето соопштение, Реал потврдува дека УЕФА ја примила жалбата поднесена од клубот, заедно со документацијата и доказите кои, според мадридскиот клуб, се однесуваат на сериозни настани поврзани со интегритетот на натпреварувањето и судискиот систем.
„УЕФА потврди дека ја прими жалбата поднесена од Реал Мадрид и продолжувањето на истрагата за исплатите направени во текот на последните две децении од страна на ФК Барселона до поранешниот потпретседател на Техничкиот комитет на судии“, се наведува во соопштението.
Од „Сантијаго Бернабеу“ дополнително посочуваат дека доставиле обемна документација и докази до европската фудбалска централа, поради што очекуваат процесот да биде завршен што е можно побрзо.
„ФК Реал Мадрид смета дека е важно, сега кога УЕФА ја има оваа документација, истрагата да продолжи што е можно побрзо до нејзино целосно заклучување и надлежните органи да донесат соодветни одлуки во согласност со сериозноста на докажаните факти“, порача клубот.
Реал Мадрид најави и дека ќе продолжи да соработува со УЕФА и да презема активности за, како што наведува, целосно разјаснување на случајот.
„Нашиот клуб ќе продолжи активно да соработува со УЕФА и да презема сите мерки во негова моќ за да разјасни настани што ги смета за некомпатибилни со принципите на интегритет, транспарентност и фер-плеј што треба да го регулираат европскиот фудбал“, стои во соопштението на Реал Мадрид.
Според „АС“, Реал Мадрид од УЕФА бара да ѝ бидат одземени титулите на Барселона освоени во годините во кои каталонскиот клуб наводно му плаќал на Негреира. Тоа се девет титули во периодот од 2001 до 2018.
