• Зоран Мишевски
Столе Димитриевски и Рајо Ваљекано остварија уште еден голем резултат во Примера. Екипата на Андре Ираола (трипати ја победи Барса на последните четири натпревари) ја совлада водечката Барселона со 2-1 (1-0) и потврди дека е „нагазна мина“ за фаворитите. Минатата есен Рајо одигра 0-0 на „Камп Ноу“, а во Ваљекас редовно паѓаат фаворитте, па така и Реал Мадрид во ноември си замина со наведната глава од ова мадридско предградие.
- Рајо Ваљекано - Барселона 2-1:
Јунак на „бело-црвените“ беше Алваро Гарсија со два погодоци, по еден во двете полувремиња. Најнапред го матира Марк Андре Тер Штеген во 19. минута, а потоа погоди во осмата минута од вториот дел. Барса го ублажи поразот со прекрасниот гол на Роберт Левандовски во 83, минута.
Рајо Ваљекано сега сонува место во Лига Европа или Конференциската лига, што би било прворазредна сензација. И покрај поразот, Барса останува лидер со единаесет бода повеќе од Реал Мадрид на седум кола до крајот на шампионатот на Шпанија.
- Селта - Елче 1-0:
Во Галиција значајни бодови освои Селта, која го совлада последнопласираниот Елче со 1-0. Голот вреден три бода за „небеско-сините“ го постигна Џозеф Ајду во 90. минута.
