• Мартин Танасковски
Фудбалерите на Пари Сен Жермен се вратија со победнички дух од дербито против Лион, славејќи со 3-2 на „Групама Стадион“ во возбудлив натпревар од 12. коло во француската Лига 1. Иако трипати мораа повторно да доаѓаат до предност, избраниците на Луис Енрике на крајот успеаја да извојуваат три мошне вредни бода и повторно да се искачат на врвот на табелата.
- Извештај од натпреварот:
Парижаните подобро го отворија натпреварот и веќе во раната фаза ја презедоа иницијативата. Витиња беше во центарот на вниманието со две клучни асистенции, најпрво за младиот Емери, кој во 18. минута со прецизен удар го совлада голманот на Лион. Домаќините реагираа брзо и преку Мореира успеаја да израмнат, користејќи една од ретките грешки во дефанзивата на ПСЖ. Сепак, само неколку минути подоцна, Витиња повторно маестрално го проигра Кварачелија, кој врати водство за гостите, резултат со кој се замина на одмор.
Во второто полувреме Лион заигра порешително. Тимот излезе повисоко на теренот, а трудот се исплати во 50. минута кога Ејнсли Мејтленд-Најлс прецизно заврши одлична акција за ново израмнување – 2-2. Следеше период на изедначена игра, со повеќе интензитет отколку шанси. Пари Сен Жермен имаше посед и создаваше притисок, но домаќинот успеа да одолее сè до самиот крај. Клучниот момент се случи во третата минута од судиското продолжение кога Николас Талијафико заработи втор жолт картон и го остави Лион со играч помалку. Тоа беше сигнал за последен напад на „светците“. По изведен корнер во петтата минута од екстра времето, Жоао Невеш највисоко скокна и со прецизен удар со глава ја затресе мрежата за конечни 3-2, предизвикувајќи ерупција на радост кај гостинските навивачи.
Со оваа победа, тимот на Луис Енрике повторно се врати на првото место на табелата со два бода повеќе од Олимпик Марсеј, покажувајќи дека останува главен фаворит за титулата. Во следното коло ПСЖ ќе го пречека Авр, додека Лион, кој и покрај поразот покажа карактер, ќе гостува на тимот на Оксер во обид да се врати на победничките патеки.
