• Иван Димовски
Фудбалерите на ПСЖ го одбранија трофејот во УЕФА Суперкупот, откако на мечот на „Ред Бул Арената“ во Салцбург беа подобри од Астон Вила со 2-1 (1-1). Апсолутниот фаворит го искористи фактот што тимот од Бирмингем беше „десеткуван“ без неколку важни играчи, па успеа да го надигра противникот и да стигне до вториот трофеј во ова натпреварување.
ПСЖ рано ја презеде контролата, а Квича Кварацкелија во 20. минута донесе предност (1-0) по одземена топка и силен удар во мрежата на Астон Вила. Гостите не се повлекоа и до паузата создадоа неколку сериозни ситуации. Особено расположен беше младиот Брајан Маџо, кој пропушти три добри можности пред конечно да погоди во 45. минута по центаршутот на Џон Мекгин за 1-1.
Астон Вила имаше подобар период и по стартот на второто полувреме. Само што започна продолжението, Мекгин шутираше кон далечниот агол, но Матвеј Сафонов одбрани. До 54. минута, англискиот тим имаше дури 11 удари, наспроти само четири на ПСЖ, но не успеа да ја претвори иницијативата во втор гол. Казната стигна во 61. минута. Дезире Дуе се проби во шеснаесетникот и со прецизен удар погоди за 2-1. Голoт беше дополнително проверуван со ВАР поради сомнеж за офсајд, но беше потврден.
Астон Вила до крајот тргна по ново израмнување. Во 73. минута Жоао Гомеш имаше одлична можност по повратна топка од десната страна, но неговиот удар од работ на шеснаесетникот заврши во блокот на Ворен Заире-Емери. Претходно и Исаак Хемингс имаше шанса, но Вила не успеа вторпат да го пронајде патот до противничката мрежа. До крајот на средбата парижани го одбранија водството и го кренаа трофејот во Салцбург.
