• Саше Љолес
Принцпт Вилијам, познат навивач на Астон Вила, беше дел од прославата по историската победа на клубот во финалето на Лига Европа, каде англискиот тим го совлада Фрајбург со 3-0 и го освои првиот европски трофеј по повеќе од четири децении.
Британскиот принц пристигна во Истанбул за да го следи натпреварот во живо, а по завршувањето на мечот се приклучи на прославата со фудбалерите во соблекувалната. Според извештаите, Вилијам бил видно еуфоричен и емотивен, а дел од прославата ја поминал во опуштена атмосфера заедно со играчите, каде бил забележан и со пијалак во рака.
Фудбалерите на Астон Вила, предводени од тренерот Унаи Емери, го споделија моментот со својот познат навивач, кој со години јавно ја поддржува екипата и често присуствува на нивните натпревари.
По натпреварот, принцот им честитал на играчите за големиот успех и го пофалил целиот тим за историската сезона, која заврши со освојување на европски трофеј и враќање на клубот на големата сцена.
Прославата во Истанбул уште еднаш ја потврди блиската врска помеѓу Астон Вила и нивниот најпознат навивач, кој овојпат беше дел од една од најголемите ноќи во историјата на клубот.
