• Редакција Gol.mk
Под импресии на спектакуларниот трансфер на Жоао Невес од Бенфика во Пари Сен Жермен, викендов ќе започне новата сезона во португалскиот шампионат, прва во која три клуба ќе влезат со две зашиени ѕвезди над грбот.
Фановите се надеваа дека ова лето може да го одбележи нивната фудбалска репрезентација на Европското првенство во Германија, но 2024 година најмногу ќе ја паметат по титулата на Спортинг. Со втората титула во оваа деценија, лисабонските „лавови“ стигнаа до 20. трофеј во националниот шампионат, со што симболично влегоа во кругот на Бенфика и Порто, кои заедно ја формираат „големата тројка“ на португалскиот фудбал. Ако се суди според пазарната вредност на играчите и висината на доделените средства за трансфери, споменатите гиганти ќе бидат главни претенденти за врвот и оваа сезона, а исходот во трката за титулата многу ќе зависи од бранителот на титулата Спортинг.
Шампионот од стадионот „Жозе Алваладе“ ќе игра и во Лигата на шампионите, а ќе има и тешка задача да ги задржи сите ѕвезди. Спортинг сезоната ја почна со шокантниот пораз од 4-3 од Порто во финалето на Суперкупот, откако прокоцка предност од три гола од првото полувреме на натпреварот во Авеиро. На мечот одигран минатиот викенд, извонредниот шведски голгетер Виктор Ѓекереш повторно се покажа како најголема движечка сила на „лавовите“ и ќе биде најголемиот адут на Спортинг на патот кон одбрана на титулата. Лисабонскиот гигант последен пат ја одбрани титулата во првата половина на 50-тите години од минатиот век, па јасно е дека сегашната генерација ќе биде на важна задача. Столбот на тимот е задржан од минатата сезона, што ќе ја направи многу полесна новата трка со се поамбициозните Бенфика и Порто, клубови кои се уште се опоравуваат од загубата на титулата минатата сезона.
Од главните конкуренти на Спортинг први на терен ќе излезат фудбалерите на Порто, кои в сабота од 21:30 часот на својот „Драгао“ ќе го пречекаат Жил Висенте. „Змејовите“ го сменија тренерот, бидејќи Витор Бруно го замени Серџо Консеисао. Уште со освојувањето на Суперкупот се навестуваа високи цели во сезоната во која ќе се обидат да ги вратат титулите во вториот по големина град во Португалија. Најгласното засилување во тимот од Порто е младиот Франциско Консеисао, синот на неодамнешниот селектор и едно од откритијата на овогодинешното Европско првенство.
В недела сите очи ќе бидат насочени кон гостувањето на Бенфика кај Фамаликао. Со продажбата на Жоао Невес на Франција, Бенфика потврди дека е убедливо најголемиот извозник на португалски таленти. Сумата што ПСЖ ја одвои за 19-годишниот фудбалер (60 милиони евра) е петта во клупската историја по големите продажби на Жоао Феликс, Енцо Фернандес, Дарвин Нуњез и Рубен Диас. Најзвучното засилување секако е доведувањето на неодамнешниот голгетер на АЗ Алкмар, Василис Павлидис, заедно со Лук де Јонг, најдобриот стрелец на минатосезонската Ередивизие.
Брага е еден од клубовите кои ќе влезат во сезоната со нов тренер, откако Руи Дуарте беше заменет со Артур Соуза од Арука. Се предвидува голема битка на водечките три-четири тимови, лансирање на многу млади таленти и врвен офанзивен фудбал.
