• Горан Упале
Како што пишува италијанска „Газета дело спорт“, вистински хаос се случува во Серија Б, каде што промените на табелата предизвикаа целосен пресврт во борбата за опстанок.
Иако беше сигурно дека Сампдорија ќе се пресели во третата дивизија во италијанскиот фудбал, Серија Ц, сега се појави голема надеж за клубот од Џенова. Причината за новиот развој на настаните е одлуката на администрацијата на Серија Б да ѝ одземе четири бода на екипата на Бреша, со што значително се промени ситуацијата на табелата. Со овој исход, Бреша паѓа под Сампдорија на табелата и им се придружува на Цитадела и Козенца како екипи кои се селат во Серија Ц.
Бараж натпреварот помеѓу Фрозиноне и Салернитана, кој требаше да се игра денес, е одложен, а најверојатно и целосно откажан. Новиот распоред значи дека Фрозиноне ќе остане во Серија Б, додека Сампдорија ќе добие шанса да остане во лигата преку бараж против Салернитана. Проблемот со Бреша се појави околу февруарскиот рок за исплата на плати и придонеси, при што клубот наводно покривал дел од него преку даночен кредит кој подоцна се покажа дека не постои.
Даночните власти имаа можност да реагираат уште од 28 февруари, кога беше пријавена неправилноста, но тоа го сторија во петокот, на 16 мај. Сè беше направено брзо, а Италијанската фудбалска федерација одлучи да одземе четири бода од контото на Бреша, доволно за да падне под Сампдорија. Бреша има право на жалба, но поверојатно е дека таа жалба нема да донесе никаков позитивен исход за нив.
