• Горан Упале
Екипата на Арсенал може да се критикува за начинот на кој што игра во последните месеци, но пред фактите и боговите молчат! Лондонскиот гигант испишува импресивна европска приказна оваа сезона, обезбедувајќи пласман во финалето на Лига на шампиони без ниту еден пораз.
Арсенал до големото финале стигна со фантастична серија од 14 натпревари без пораз, при што забележа дури 11 победи и само три ремија. Ваквата конзистентност го потврдува квалитетот и зрелоста на екипата, која во текот на целото натпреварување делуваше сигурно и организирано.
Особено импресивен е дефанзивниот учинок. „Топчиите“ примија само шест гола на 14 натпревари, што говори за цврстината во одбраната и одличната поставеност на тимот во сите фази од играта.
Арсенал покажа дека може да се носи со најсилните европски екипи, а дисциплината и тактичката стабилност беа клучни фактори за овој историски успех. Сега, тимот од Лондон е на чекор до најголемиот трофеј во европскиот клупски фудбал, со серија која влева самодоверба и верба дека може да се оди до самиот крај.
