• Иван Димовски
Екипата на Легија од Варшава живее тешки моменти. Откако минатата сезона беа шампиони, сега фудбалерите на славниот полски клуб се последнопласирани во првенството.
Иако играа и во групната фаза на Лигата на Европа, а таму успеаја да запишат и две победи со Лестер и Спартак Москва, Полјаците играат катастрофално во домашниот шампионат. Вчера Легија загуби на гостувањето кај Висла Плок (1-0), а тоа навистина ги налути навивачите.
Според најавите на полските медиуми, фановите кои биле на ова гостување имале близок контакт со фудбалерите. Откако играчите и стручниот штаб на Легија се собрале во автобусот, во него влегле и група бесни навивачи. Најверните фанови на клубот и физички ги нападнале фудбалерите поради катастрофалните резултати.
Легија по 16 одиграни натпревари во полското првенство е последна со 12 бода од четирите победи, но има дури 12 порази.
