• Мартин Танасковски
Македонската фудбалска легенда Горан Пандев беше член на последната генерација на Интер која ја освои Лигата на шампионите. Нераѕурите по тринаесет години пак се во финалето, овој пат противник ќе им биде Манчестер Сити.
Легендата на мак-фудбалот говореше за финалниот натпревар за италијанските медиуми и истакна дека мора да се верува во чудо со „граѓаните“ кои играат во врвна форма.
„Интер мора да верува во чудо. Заслужено е во финалето, затоа што да се добијат две дербија не е лесно. Исто мора да размислиме и да се вратиме назад, притисокот кој го имаше тимот, дискусиите за дербито и желбата за одмазда за онаа елиминација од минатото, го однесоа Интер во финалето. Не беше лесно да се дојде до мечот за титула, само силните играат такви мечеви, а Интер покажа дека е силен тим“, изјави Пандев.
Финалето од Лигата на шампионите е закажано на 10 јуни во Истанбул, на стадионот на Бешикташ.
