• Зоран Мишевски
Нов скандал го тресе францускиот гигант и поранешниот европски првак, Олимпик Марсеј. Клубот од Азурниот брег би можел да биде исклучен од Лига Европа следната сезона, поради сериозните финансиски проблеми што во моментов ги истражува УЕФА. Олимпик Марсеј се бори да ги исполни условите од договорот за спогодба што го потпиша со УЕФА во 2022 година.
Пред четири години клубот од Марсеј ги прекрши правилата за финансиски фер-плеј и беше казнет со парична казна од два милиони евра. За возврат, тој се обврза да ги доведе своите сметки во рамките на правилата за одржливост на УЕФА.
Сепак, Олимпик Марсеј не успеа да го запре негативниот тренд и забележал вкупна нето загуба од речиси 157 милиони евра во последните три сезони. Во исто време, загубите постојано растеле: од 12,7 милиони евра во сезоната 2022/23 до 39,1 милиони евра во сезоната 2023/24, а во сезоната 2024/25 достигнале дури 105 милиони евра.
Олимпик Марсеј наводно се обиде да оправда дел од своите финансиски тешкотии со падот на приходите од продажбата на домашните телевизиски права во Франција. Но, по неодамнешната ревизија спроведена од консултантската компанија „Тифоси Капитал“ проблемите станаа уште поголеми. Извештајот посочи на голем број нерегуларности, вклучувајќи преголем буџет за плати, високи оперативни трошоци и дополнителни обврски за трошење во блиска иднина.
