• Иван Димовски
Фудбалерите на Оксер победија по пауза од десет натпревари во француската Лига 1, откако со пресврт го совладаа фаворитот Лион (2-1). Средбата на „Aбе Дешамп“ тргна со гостинска предност, меѓутоа домаќинот со „блиц-криг“ дојде до целосен пресврт и на крајот победа.
Лион беше подобар тим на теренот, имаше повеќе од играта и диктираше темпо, па на водечки погодок се чекаше до 36. минута. Толисо упати прецизна топка на петерецот, а таму со глава добро се снајде Муса Дембеле и погоди за 0-1.
Иако изгледаше дека Лион има сè под контрола, два прекини доведоа до пресврт. Во 50. минута Оксер доби најстрога казна по еден фаул, а сигурен од единаесет метри беше Перин за 1-1. Неполни 120 секунди подоцна, по еден корнер, Да Коста од прва статива префрли на втора статива, па Јубал кој беше осамен реализира за целосен пресврт (2-1).
До крајот на мечот Лион се обиде да се врати, меѓутоа не успеа и претрпе непланиран неуспех за крај на добрата серија.
