• Мартин Танасковски
Полската фудбалска легенда Роберт Левандовски и официјално ќе ја продолжи кариерата во американската МЛС лига, откако потпиша договор со Чикаго Фајер. Клубот потврди дека искусниот напаѓач ставил потпис на двегодишен договор, кој ќе стане официјален по завршувањето на процедурите околу визата и меѓународниот сертификат за трансфер.
Левандовски во Чикаго пристигнува како едно од најголемите засилувања во историјата на клубот. Во моментот на прекинот на првенството поради Светското првенство, Чикаго Фајер се наоѓа на третото место во Источната конференција со освоени 26 бодови по 14 одиграни натпревари.
Доколку целата документација биде комплетирана навреме, полскиот голгетер би можел да дебитира за својот нов клуб на 16 јули, кога Чикаго ќе се соочи со Ванкувер.
Левандовски, кој на 21 август ќе наполни 38 години, зад себе остава блескава етапа во дресот на Барселона. Во четири сезони со каталонскиот гигант освои три шампионски титули во шпанската Примера, вклучувајќи ја и последната сезона, како и еден трофеј во Купот на кралот. За Барселона одигра 192 натпревари и постигна 119 голови.
Во шпанскиот клуб пристигна во 2022 година од Баерн Минхен, во трансфер вреден 52 милиони долари. Претходно остави длабока трага и во германскиот фудбал, каде во дресовите на Баерн Минхен и Борусија Дортмунд постигна вкупно 312 голови на 384 натпревари во Бундеслигата, освојувајќи дури десет шампионски титули.
