• Саше Љолес
Екипата на Баерн Минхен успеа да ја освои титулата во Бундеслигата, откако по голема драма во последното коло ја „прескокна“ Борусија Дортмунд. Сезоната за Баварците беше навистина тешка и исполнета со турбуленции, но сепак, ја завршуваат со еден важен трофеј во витрините.
Веќе е најавена „реконструкцијата“ на тимот и извесно е дека неколку играчи ќе го напуштат тимот, а таков е случајот и со холандскиот репрезентативец Дејли Блинд кој во дресот на баварскиот гигант забележа само шест настапи. Дефанзивецот во јануари пристигна во Минхен и потпиша договор до крајот на сезоната, но не успеа да се наметне и да избори место во првиот состав.
Тренерот Томас Тухел веќе му соопштил на играчот дека среќата ќе мора да ја побара во друг клуб, а заминувањето на Блинд е логичен чекор на управата која сака сериозно да го промени тимот за следната сезона. Холанѓанецот во својата кариера играше за Ајакс, Манчестер Јунајтед и Баерн Минхен, а во дресот на „црвените ѓаволи“ одигра 90 натпревари и постигна четири голови.
Холандските медиуми веќе шпекулираат дека Блинд би можел по трет пат да се врати во Ајакс, но фудбалерот наводно има понуди и од клубови од Шпанија, Германија и Италија. 33-годишниот Дејли Блинд беше еден од најдобрите леви бекови на својата генерација и потекнува од школата на Ајакс, која е убедливо најдобра во Европа. За репрезентацијата на Холандија настапи на 101 натпревар и постигна три гола.
