• Мартин Танасковски
Актуелниот шампион на Србија, Црвена Звезда, продолжува да се мачи во домашното првенство. Во натпреварот од 14. коло на Суперлигата, белградскиот гигант ремизираше на домашен терен против Радник од Сурдулица со резултат 1-1, што е нивен трет кикс во тековната сезона. Иако беа апсолутен фаворит, избраниците на тренерот не успеаја да ја потврдат улогата на најсилен тим во лигата.
Првото полувреме помина без поголеми возбудувања, со доминација во поседот на топката од страна на домаќинот, но без реална закана кон противничкиот гол. Радник се бранеше организирано, со компактна одбрана и дисциплинирано движење на сите линии, што целосно ги неутрализираше офанзивните обиди на црвено-белите. Промената дојде на почетокот од вториот дел кога Александар Катаи во 51. минута конечно ја пронајде слабата точка во одбраната на гостите и го отвори резултатот со прецизен удар од внатрешноста на шеснаесетникот. Се чинеше дека Звезда конечно го скрши отпорот на Радник и дека ќе следи период на доминација и дополнителни погодоци.
Сепак, само тринаесет минути подоцна, следуваше студен туш за домашната публика. По одлична контраакција, резервистот Ѓорѓе Јовановиќ се најде сам пред голманот Матеус и сигурно ја смести топката во мрежата за 1-1. Погодокот целосно го промени текот на натпреварот, бидејќи домаќините повторно влегоа во нервозен ритам, без јасна идеја во нападот и без потребната енергија за нов пресврт.
До крајот на натпреварот, и покрај зголемениот притисок, Црвена звезда не успеа да создаде сериозна шанса што би ја донела посакуваната победа. Радник остана цврст и организиран, а нивната одбрана издржа до последниот свиреж, освојувајќи вреден бод на едно од најтешките гостувања во лигата.
Овој кикс за црвено-белите кој е трет во низа доаѓа пред мечот со Лил во четврток во Лигата на Европа.
