Нов тренер во Дебар Маало: Влахо ќе го води Работнички

Работнички го именуваше Александар Влахо за нов шеф на стручниот штаб. Тој денеска потпиша договор во наредните две сезони да ги води дебармаалци.

Се работи за млад, но веќе доволно искусен стратег кој има идентична визија со раководството на Работнички. Александар Влахо е среќен што добива можност да биде кормилар на Работнички и се надева дека со напорна работа ќе успее да ги оствари зацртаните цели на клубот.

„Би сакал да се заблагодарам на претседателот Драган Поповски и раководството на Работнички за довербата, се надевам дека максимално ќе ја оправдам со напорна работа и со успешни резултати. Не очекува многу работа, клубот е во фаза на формирање на нов тим, а максимално ќе бидеме посветени и да ја задржиме стратегијата за форсирање на млади фудбалери од младинската школа“, изјави Александар Влахо.

На соработката се радува и претседателот на Работнички, Драган Поповски, кој истакна дека се работи за млад домашен тренер, познавач на македонскиот фудбал.

„По преговорите со неколку домашни и странски стратези, донесовме одлука Александар Влахо да биде именуван за нов шеф на стручниот штаб на Работнички. Се работи за млад домашен стратег кој има ПРО лиценца, добро го познава македонскиот фудбал, а истовремено има и одредено интернационално искуство. Низ разговорите се покажа дека има визија речиси идентична со нас за развојот и напредокот на ФК Работнички, гладен е за успеси и добива шанса да се докаже на кормилото на нашиот тим“, вели Поповски.

Првата прозивка за новата фудбалска сезона, Александар Влахо ќе ја изврши на 26 јуни, со почеток во 18:00 часот, во клупската база на Работнички.