• Горан Упале
Ливерпул до пред само два дена имаше игра на три фронта и ја сакаше тројната круна, но доби тежок удар од Пари Сен Жермен што значеше елиминација од Лигата на шампионите, па тоа може да ги потресе „црвените“ до крајот на сезоната. Титулата во Премиер лигата е на дофат, но на патот до трофејот во Лига Купот му претстои уште неделно финале против Њукасл.
Иако Ливерпул е апсолутен фаворит против тим кој не го победил цела деценија, во седумнаесет последователни натпревари, несомнено е дека колапсот во Лигата на шампионите ќе остави одредени последици на психолошкиот аспект на тимот на Арне Слот.
Њукасл има огромен мотив, тие имаат за цел да го подигнат својот прв трофеј од 1955 година и да го освојат ФА Купот. 70-годишната суша може да биде и мотивирачки и оптоварувачки фактор за тимот на Еди Хау, кој нема да може да смета на неколку важни играчи.
Еден од најпродуктивните играчи сезонава, Ентони Гордон е суспендиран, финалето ќе го пропушти и левиот бек Луис Хол, додека на другата страна има шанси Арне Слот да биде лишен од услугите на Трент Александер-Арнолд.
Њукасл и Ливерпул се судрија два пати оваа сезона, а „страчките“ дадоа сериозен отпор на „Сент Џејмс Парк“ (3-3) каде Гордон беше еден од стрелците, а Трент забележа две асистенции. Доколку го сака долго очекуваниот трофеј, Њукасл ќе мора да се ослободи од комплексот кој доби уште поцврсти темели во последните години, бидејќи „Страчките“ загубија седум од последните осум средби со „црвените“.
