• Горан Упале
Француската јавност е потресена од неверојатен криминален случај во кој, според информациите на „Ле Паризиен“, криминална група наводно планирала серија киднапирања и напади врз богати и познати личности. Меѓу потенцијалните мети се нашол и Килијан Мбапе, една од најголемите ѕвезди на светскиот фудбал.
Во центарот на истрагата е 18-годишниот Клеман Л., за кого француските власти се сомневаат дека бил организатор, односно нарачател на повеќе кривични дела. Според истрагата, тој со соучесници наводно планирал напади врз богати бизнисмени, познат рапер, но и фудбалерот на Реал Мадрид и француската репрезентација.
Сомнителните активности се однесуваат на периодот од 11 април до 19 август, на повеќе локации во Франција. Клеман Л. бил идентификуван по нападот врз сопственик на златарница во Неји-сир-Сен во април. На 21 август бил ставен под истрага и завршил во притвор, каде што е сместен во самица, додека неговиот наводен соучесник бил пуштен под судски надзор.
Француското обвинителство сега ги истражува сите детали од случајот, вклучително и мотивите и начинот на кој биле избирани потенцијалните жртви. Засега станува збор за наводи од истрагата, а не за потврден обид за киднапирање на Мбапе, но фактот што името на една од најголемите фудбалски ѕвезди се нашло на наводната листа на мети предизвика огромно внимание во Франција.
