• Горан Упале
Манаџерот на Манчестер Сити, Пеп Гвардиола, на последната прес-конференција, наместо за фудбалот, повеќе зборуваше за војните што беснеат низ светот, изразувајќи негативен став кон сè што се случува во Судан, Палестина, Русија, Украина...
Додека говореше за конфликтите во светот, во кои најчесто животите ги губат невини луѓе, Гвардиола го спомена и Судан, што го привлече вниманието на медиумите. Според светските извештаи, повеќе од 150 илјади цивили го загубиле животот во граѓанската војна, а според наводите на ОН, Обединетите Арапски Емирати поддржуваат паравоени групи во таа земја.
Тоа, секако, го привлече вниманието на новинарите, бидејќи сопствениците на Манчестер Сити доаѓаат токму од ОАЕ, па ги интересираше каков став има Пеп Гвардиола по тоа прашање, со оглед на тоа што е познато колку шпанскиот стручњак се спротивставува на секој облик на насилство.
„Се убиваме едни со други, а за што? За што? Никогаш во историјата на човештвото не сме можеле толку јасно да ги видиме сите информации со сопствени очи. Геноцидот во Палестина, она што се случува во Украина, она што се случува во Русија, сè што се случува ширум светот, во Судан, насекаде.
Што се случува пред нашите очи? Дали сакаме да го видиме? Дали тоа е проблем на сите нас како човечки суштества? Тоа е наш проблем, само наш. Мене тоа ме боли. Ако имаш идеја што треба да ја браниш така што ќе убиваш илјадници и илјадници невини луѓе… Жал ми е, но јас секогаш ќе станам против тоа, секогаш.
Светот е подобар од кога било, во смисла на можности – можеме да одиме на Месечината, можеме да направиме што било. А ние сè уште се убиваме едни со други? За што? Ги гледам тие слики. И ме боли, навистина боли. Затоа ќе користам секој начин да помогнам. Ако тоа е да зборувам, можеби нема да сменам ништо, но ќе се обидувам. Ќе бидам тука.
Pep Guardiola gave a passionate speech over global conflicts in Ukraine, Palestine, Sudan and the US.
Meanwhile, protest groups have urged Man City's UAE owners to be held accountable over their links to the Sudan war. pic.twitter.com/iBCUdNSKC8
— DW Sports (@dw_sports) February 4, 2026
Погледнете што се случува во Соединетите Американски Држави. Рене Гуд и Алекс Прети беа убиени. Таа беше медицинска сестра. Замислете дека тоа е некој од нашето здравство. Пет, шест луѓе го опкружуваат, го фрлаат на тревата, десет куршуми. Кажете ми, како некој може да го брани тоа? Човекот што ја бранел жената го опкружиле и бил убиен. Не знам кој може да го брани тоа“, изјави Гвардиола.
Инаку, вечерва тој и неговиот Манчестер Сити и Њукасл ќе водат битка на теренот за влез во финалето од Лига Купот на Англија. На првиот полуфинален дуел победа извојува Сити со 2-0.
