По серијата негативни резултати, Работнички конечно го скрши малерот и ако до сега губеше бодови во судиското надополнување, сега ги освои. Бедемот на новиот прволигаш Младост Царев двор беше скршен во судиското надополнување, кога момците на Ангеловски постигнаа два гола.
Работнички едвај стигна до трите бода од дуелот против Младост ЦД во 13. коло од ПМФЛ, победувајќи со 2-0. По трите претходни нерешени резултати видлива беше желбата меѓу дебармаалци за првенствен триумф, што веднаш се почуствува на теренот.
Толку често фудбалерите на Работнички опоменуваа на деконцентрацијата и на примените голови во последните секунди од мечот, како да сакаа да најават дека еден ден тоа ќе им се врати. 3-4 пати примија голови и загубија бодови во последните секунди. А баш на таков начин, дебармаалци го скршија отпорот на Младост Царев Двор во рамките на 13. коло. Илијоски и Вујчиќ во судиското надополнување реализираа за еуфорија и голем скок на табелата за екипата на Ангеловски.
