• Мартин Танасковски
Аргентинскиот фудбал повторно беше во центар на вниманието, овојпат со настан кој ја разбуни јавноста и предизвика жестоки реакции во целата земја. Плеј-оф натпреварот меѓу Росарио Централ и Естудијантес, кој и без тоа носеше резултатски притисок, се претвори во сцена на вистинска драма откако одлуките на АФА предизвикаа бурни реакции и контроверзии какви ретко се гледаат.
Неколку дена пред натпреварот, Аргентинската фудбалска асоцијација излезе со неочекувано соопштение. АФА еднострано објави дека Росарио Сентрал е годишен шампион, со образложение дека клубот освоил најмногу бодови ако се соберат двата турнира што се играа во текот на годината. Одлуката не само што беше изненадувачка, туку и за многумина нелогична, бидејќи титулата практично беше доделена по завршена сезона, без претходно да се знае дека таков трофеј воопшто постои. Играчите, стручниот штаб и навивачите на Росарио Централ дознаа дека станале шампиони дури кога АФА го објави тоа, што само дополнително ја вжешти атмосферата.
Естудијантес веднаш реагираше. Клубот, под водство на претседателот и легенда на аргентинскиот фудбал Хуан Себастијан Верон, јавно истакна дека не се согласува со ништо од одлуката. Според нив, титулата не можела да биде доделена без претходно гласање на клубовите и без усвоено правило пред почетокот на сезоната. Тврдеа дека АФА донела еднострана одлука со која го поткопува спортскиот интегритет, а реагираа и други клубови кои сметаа дека преседан од ваков тип може дополнително да ги наруши натпреварите во иднина. Но, наместо да ја ублажи ситуацијата, АФА направи чекор кој ја подигна тензијата уште повеќе. Асоцијацијата наложи Естудијантес да изведе почесен шпалир пред натпреварот, како симболично признавање на новиот шампион. Наредбата беше прифатена, но очигледно без поддршка или добра волја.
Кога дојде денот на натпреварот, вниманието на јавноста беше насочено кон шпалирот. Играчите на Естудијантес навистина застанаа во две колони на почетокот од теренот, како што беше наредено. Публиката во стадионот и гледачите пред телевизиските екрани очекуваа традиционален момент на чест и фер-плеј. Но настанот доби сосема поинаков карактер во моментот кога Анхел ди Марија, симболот на Росарио Централ и еден од најголемите аргентински играчи на својата генерација, зачекори кон нив. Секој играч на Естудијантес, синхронизирано и без збор, се заврте со грб кон Ди Марија и неговите соиграчи. Молкот што следеше зборуваше повеќе од секој протест. Тоа беше јасна, силна и многу храбра порака упатена кон АФА и кон нејзината одлука. Гестот се прошири на социјалните мрежи со огромна брзина и во рок од неколку минути стана тема број еден во аргентинските спортски медиуми.
АФА веднаш најави дека ќе се разгледа можноста за санкции кон Естудијантес поради, како што се наведува, непочитување на предвидените церемонијални протоколи. Од клубот пак не се откажаа од својот став и порачаа дека постојат граници на тоа што може да се прифати, независно од институционалниот притисок. Предупредија дека ќе се борат против секоја казна и дека нивниот гест бил единствениот начин да покажат дека не се согласуваат со манипулации во фудбалот.
Додека натпреварот продолжи под сенка на контроверзиите, аргентинската јавност и понатаму жестоко дебатира за одлуката на АФА и за начинот на кој клубовите треба да реагираат во вакви ситуации. Ситуацијата ги откри пукнатините во управувањето со аргентинскиот фудбал и повторно потсети дека зад секоја титула, секој натпревар и секое правило стои комплексен систем кој често предизвикува повеќе прашања отколку одговори.
Многумина се сомневаат дека „виновникот“ за оваа одлука е Анхел ди Марија. Аргентинската легенда се очекува по крајот на оваа сезона да оди во пензија, па токму затоа целата работа била испланирана за тој да замине меѓу легендите со голем домашен трофеј со клубот од детството.
