• Зоран Мишевски
Натпреварите меѓу Јувентус и Милан претставуваат најстарото и сè уште активно дерби во италијанскиот фудбал. Овие два великани првпат се сретнале уште во 1901 година, а претстојниот дуел ќе биде нивни вкупно 311. меѓусебен натпревар во сите натпреварувања. „Старата дама“ досега има 115 победи, Милан 102, додека 93 натпревари завршиле без победник.
И двата тима одлично ја отворија новата сезона и се наоѓаат во групата екипи со максимални шест бода по првите две кола. Јувентус сè уште нема примено гол, откако славеше со 1-0 на гостувањето кај Фрозиноне, а потоа ја совлада Парма со 2-0 во Торино. Милан беше подобар од Торино на гости со 2-1, а потоа ја победи и Венеција на „Сан Сиро“ со 2-0.
Јасно е дека тоа беа натпревари за влегување во ритам, а големото дерби под Алпите треба да покаже кои се реалните можности на двата тима и дали навистина имаат квалитет да се вклучат во битката за врвот на табелата, пред сè со актуелниот шампион Интер.
Јувентус во дербито влегува со сериозни кадровски проблеми. На подолг период остана без Кенан Јилдиз и Кефрен Турам, а надвор од конкуренција е и Андреа Камбијазо. Францускиот играч ги пропушти целите подготовки, по што лекарскиот тим одлучи да биде опериран на коленото, додека Јилдиз и Камбијазо се повредија во првите две првенствени кола. За разлика од противникот, во таборот на Милан нема поголеми проблеми со повреди.
Интересно е што дури три од последните шест меѓусебни пресметки завршија без голови, а само двапати на последните десет натпревари беа постигнати повеќе од три гола. Со оглед на раната фаза од сезоната, тешко е да се очекува премногу отворен и офанзивен натпревар во недела. Напротив, сите показатели најавуваат внимателна и тактички дисциплинирана битка во која секоја грешка може да биде пресудна.
