• Саше Љолес
Фудбалерите на Бенфика повторно ги разочараа своите навивачи, ремизирајќи со конечни 2-2 против Каса Пиа во натпреварот од 11. коло на португалската Примеира лига, одигран на „Естадио да Луж“.
„Орлите“ доминираа во првиот дел и стигнаа до убедлива предност со головите на Георгиј Судаков во 17. минута и Вангелис Павлидис од пенал во 60. минута. Се чинеше дека сè оди според планот на тренерот Жозе Мурињо, но потоа следуваше вистински шок.
Во 65. минута, судијата досуди пенал за Каса Пиа по фаул во шеснаесетникот. Голманот на Бенфика го одбрани првичниот удар, но по неуспешниот обид за расчистување, Томас Араухо несреќно ја закачи топката и ја спроведе во сопствената мрежа - несекојдневен автогол кој произлезе токму од одбранетиот пенал.
Тој момент целосно ја смени динамиката на натпреварот. Гостите добија крилја, а во 91. минута, Ренато Нијага со силен удар израмни на 2-2 и донесе вредно реми за гостинскиот тим.
По мечот, тренерот на Бенфика, Жозе Мурињо, и спортскиот директор Рои Кошта, остро реагираа на арбитражата, тврдејќи дека тимот бил оштетен со спорните судиски одлуки. Сепак, најголемата тема остана несреќниот автогол, кој практично го промени текот на мечот и можеби ќе има сериозни последици во битката за врвот на табелата.
