• Саше Љолес
Полуфиналето на Светското првенство меѓу Англија и Аргентина се очекува со големо нетрпение. Натпреварот ќе се одигра во среда во Атланта, со почеток во 21:00 часот по македонско време.
Ова не е само борба за место во финалето, туку и пресметка на две репрезентации чие ривалство одамна ги надмина спортските рамки. Односите меѓу двете земји се обележани од војната за Фолкландските Острови во 1982 година, а на фудбалски план најпознатo останува четвртфиналето од Мундијалот во 1986 година, кога Диего Марадона ги постигна двата легендарни гола - едниот со прочуената „Божја рака“, а другиот по фантастичен соло-продор.
Аргентина беше подобра и на Светското првенство во Франција во 1998 година, кога по изведување пенали ја елиминира Англија, во натпревар што остана запаметен и по црвениот картон на Дејвид Бекам. Англичаните возвратија четири години подоцна во Јапонија и Јужна Кореја, кога победија со 1-0 благодарение на голот на Бекам од пенал.
Историјата, сепак, е на страната на „гаучосите“, кои по шести пат ќе играат полуфинале на Светско првенство. Уште повпечатлив е податокот дека Аргентина никогаш не била поразена во оваа фаза од Мундијалот.
Првото полуфинале го доби уште на дебитантското Светско првенство во 1930 година против САД. Следниот настап меѓу четирите најдобри беше во 1986 година, кога предводена од Марадона ја совлада Белгија. Во 1990 година ја елиминира Италија по пенали, а во 2014 година на ист начин беше подобра од Холандија.
На последното Светско првенство во Катар, Аргентина убедливо ја победи Хрватска со 3-0 и се пласираше во финалето, каде што подоцна ја освои светската титула.
Останува да се види дали актуелниот светски шампион ќе ја продолжи својата совршена серија во мундијалските полуфиналиња или Англија конечно ќе стави крај на таа традиција.
