• Саше Љолес
Екипата на Монца успеа попладнево да слави победа над Емполи со 2-1. Ова беше дуел на две екипи кои забележаа порази во минатото коло од Серија А, а домаќините излегоа како победници во прилично тврдиот дуел.
По малку внимателниот почеток на двете страни, првиот погодок дојде во 19. минута од натпреварот преку Патрик Чурија и Монца поведе со 1-0. Гостите до крајот на првиот дел се заканија двапати преку Капуто и Сатриано, но резултатот остана непроменет. Стартот на второто полувреме веднаш донесе нови возбудувања. Емполи успеа да дојде до израмнувачки погодок преку уругвајскиот напаѓач Мартин Сатриано во 51.минута. Следуваше период на неколку замени во двата табора, а Емполи дури имаше и една шанса за комплетен резултатски пресврт.
Сепак, Монца беше таа што постигна втор погодок, овој пат преку дефанзивецот Армандо Ицо кој одлично се снајде по една нафрлена топка од корнер и со глава успеа да го матира гостинскиот голман Перисан.
- Извештај од натпреварот:
Емполи се обиде да постигне уште еден гол до крајот, но Монца умешно ги затвори сите приоди кон голот на Ди Грегорио.
Ова беше деветта победа за Монца сезонава, во моментов се на деветтото место во Серија А, додека Емполи го забележа деветтиот пораз во актуелната калчо кампања и се наоѓа на тринаесеттото место на табелата.
