• Иван Димовски
Младиот Франческо Камарда се очекува да биде стартер за екипата на Милан во саботниот дуел против Каљари во Серија А.
Алваро Мората доби удар во главата на тренинг по судир со Страхиња Павловиќ, заврши во болница и поради мерки на претпазливост не е во комбинација за настап. Тоа му направи проблем на тренерот Паоло Фонсека бидејќи ниту Тами Абрахам не е целосно заздравен за да игра.
Предводникот на „росонерите“ реши и соопшти дека нападот на Сардинија ќе го предводи младиот Франческо Камарда. 16-годишното момче редовно тренира со првиот тим, но настапува за Милан Футуро во Серија Ц.
„Абрахам нема да биде стартер. Ќе игра Камарда. За мене не е изненадување што ќе се најде во тимот, тој работи секој ден со нас многу професионално иако има 16 години. За мене играчите немаат години туку квалитет. Во овој момент Камарда е поподготвен од Абрахам, не се плаши од ништо и делува како да има 24 или 25 години.
Минатата сезона Франческо Камарда исто така во недостиг на опции во нападот стана најмлад фудбалер кој заиграл во Серија А со 15 години и 260 дена. Сега ќе биде трет најмлад стартер на Милан во калчото.
Сезонава тој заигра за „росонерите“ во Лигата на шампионите против Клуб Бриж, дури постигна и гол кој беше поништен поради недозволена позиција.
