• Иван Димовски
Аргентина со убедлива победа над Исланд ги заврши подготовките за Светското првенство, откако на пријателскиот натпревар во Алабама славеше со 3-0.
Светските шампиони уште од стартот ја наметнаа својата игра, иако првата голема шанса ја имаа Исланѓаните. Микаел Елертсон се најде во одлична позиција пред голот, но од непосредна близина шутираше над пречката и не успеа да го изненади аргентинскиот голман. Казната стигна брзо. По лоша реакција на исландската одбрана, Валентин Барко најдобро се снајде на работ од шеснаесетникот и со прецизен удар донесе водство за „гаучосите“. Младиот фудбалер така го постигна својот втор погодок во последните три настапи за националниот тим.
До крајот на првиот дел Аргентина продолжи да притиска, а најдобрата можност да ја зголеми предноста ја имаше Нико Паз, кој не успеа да го совлада Елијас Рафн Олафсон. Во продолжението избраниците на Лионел Скалони создадоа уште неколку опасни ситуации. Алексис Мекалистер ја погоди стативата по асистенција на Лаутаро Мартинез, а потоа вниманието на публиката беше насочено кон влегувањето во игра на Лионел Меси. Само неколку моменти по неговото појавување на теренот, аргентинската ѕвезда изнуди пенал откако неговиот продор заврши со прекршок врз Лаутаро Мартинез во казнениот простор. Токму Меси ја презеде одговорноста и сигурно реализираше. Конечните 3-0 беа поставени во финишот кога Меси уште еднаш ја покажа својата визија, пронаоѓајќи го Родриго Де Пол, по чија акција Тијаго Алмада рутински ја затресе мрежата.
- Извештај од натпреварот:
Со оваа победа Аргентина ја продолжи одличната серија и стигна до седми последователен триумф пред премиерниот натпревар на Мундијалот против Алжир на 17 јуни.
