• Мартин Танасковски
Шпански Реал Мадрид го претрпе првиот пораз во новата сезона од Ла Лига, откако вечерва загуби на гостувањето кај Бетис со 1-0 во натпревар во кој избраниците на Жозе Мурињо пропуштија неверојатен број шанси.
- Извештај од натпреварот:
„Кралевите“ доминираа речиси во текот на целиот натпревар, но не успеаја да ја затресат мрежата на домашниот тим. Винисиус Жуниор во првото полувреме промаши одлична можност и ја погоди стативата, Дин Хујсен ја затресе пречката, додека Килијан Мбапе не искористи две стопроцентни шанси кои беа спасени со херојски интервенции на одбраната на Бетис.
На паузата се замина без голови, а дополнителна тензија внесе и кратката расправија меѓу Хујсен и Арда Ѓулер, која брзо беше смирена од Тибо Куртоа. И во второто полувреме Реал продолжи да напаѓа, создавајќи шанси пред голот на Бетис, но без конкретна реализација. Казната стигна во 81. минута кога Трој Парот одлично се снајде во шеснаесетникот и донесе водство од 1-0 за домашниот состав.
Во завршницата Реал тргна на сè или ништо. Мбапе уште еднаш беше блиску до гол, но ја погоди пречката, а потоа Карлос Еспи ја испрати топката во мрежата во 87. минута. Сепак, радоста на гостите беше краткотрајна, бидејќи по ВАР-проверката погодокот беше поништен.
Драмата продолжи и во судиското продолжение. Натан го собори Винисиус во казнениот простор, а судијата Алехандро Ернандез без двоумење покажа на белата точка. Одговорноста ја презеде Мбапе, но голманот Алваро Ваљес уште еднаш беше херој на Бетис и го одбрани неговиот удар.
Со фантастичната партија на Ваљес и голот на Парот, Бетис стигна до голема победа против Реал Мадрид, додека тимот на Мурињо остана без бодови и покрај целосната доминација и бројните шанси што ги создаде во Севилја.
