• Мартин Танасковски
Фудбалерите на Лил продолжуваат со одличниот старт во новата сезона од француската Лига 1. По убедливиот триумф од 7-1 против Лоријан, многумина очекуваа дека тимот ќе има лесна задача и против Тулуз, но натпреварот од четвртото коло донесе многу поголема драма. Со два гола во самиот финиш, Лил успеа да направи целосен пресврт и да слави со 2-1.
Првото полувреме мина во целосна доминација на домаќините. Лил упати дури 12 удари кон противничкиот гол, додека гостите од Тулуз не се заканија ниту еднаш. Сепак, голот на гостинскиот чувар на мрежата остана недопрен и на паузата резултатот беше 0-0. Второто полувреме донесе вистинска неизвесност. Во 51. минута Магри ја искористи единствената сериозна шанса на Тулуз и го доведе својот тим во водство од 0-1. Тоа беше сигнал за уште поголема борба, а гостите со дисциплинирана игра успеваа да го одржуваат резултатот до самата завршница.
Клучниот момент се случи во 80. минута, кога Алексис Воса направи груб старт и по интервенција на ВАР доби директен црвен картон. Тој потег скапо го чинеше Тулуз, бидејќи Лил со играч повеќе ги искористи последните моменти од натпреварот. Прво, во 90. минута, Бенталеб од белата точка израмни на 1-1. Но, домаќините не застанаа тука. Во деветтата минута од судиското продолжение Сарауи испрати прецизен центаршут од левата страна, а Мбапе со моќен удар со левата нога ја затресе мрежата за конечни 2-1.
Со овој драматичен триумф Лил се искачи на првото место на табелата со 10 бодови по четири одиграни кола. Од друга страна, Тулуз го претрпе својот втор последователен пораз и остана на шест бодови, што моментално го позиционира тимот на деветтата позиција.
