• Горан Упале
Манчестер Јунајтед го комплетираше трансферот на белгискиот репрезентативец Јури Тилеманс, кој пристигнува од Астон Вила и потпиша петгодишен договор со англискиот великан.
„Црвените ѓаволи“ за искусниот играч за врска платија 41 милион евра (35 милиони фунти), откако ја активираа неговата откупна клаузула.
„Тешко ми е да опишам колку сум горд што станав фудбалер на Манчестер Јунајтед. Да потпишеш за толку посебен клуб е неверојатно чувство и круна на годините посветеност откако се заљубив во фудбалот“, изјави Тилеманс по официјализацијата на трансферот.
Дваесет и деветгодишниот Белгиец со години е еден од најквалитетните играчи за врска во Премиер лигата. По четирите сезони во Лестер и трите во Астон Вила, зад себе има 244 настапи во англискиот шампионат со учинок од 26 голови и 39 асистенции.
Кариерата ја започна во Андерлехт, потоа настапуваше за Монако, а во 2019 година прво пристигна на позајмица во Лестер, кој неколку месеци подоцна го откупи неговиот договор за 45 милиони евра. По испаѓањето на „лисиците“ во Чемпионшип, како слободен играч се пресели во Астон Вила, каде беше еден од лидерите на тимот.
Минатата сезона одигра 35 натпревари во сите конкуренции, постигна два гола и запиша седум асистенции. Со Астон Вила ја освои Лига Европа, додека со Лестер ги освои ФА Купот и Комјунити Шилд.
Со доаѓањето на Тилеманс, Манчестер Јунајтед го заокружи реконструирањето на средниот ред. Тимот на Мајкл Керик веќе го ангажираше Андреј Сантос од Челси, а во конкуренција за место во средниот ред се и Коби Мејну и капитенот Бруно Фернандеш, кој останува главен организатор на играта.
