Македонија У19 во меч со седум гола загуби од Полска

Македонската фудбалска репрезентација до 19 години доживеа пораз на првиот контролен натпревар кој се играше против Полска на гостински терен, во меч со седум гола кој заврши со резултат 4-3 за домаќинот.

Нашите фудбалери покажаа солидна игра во воведните 30 минути, па дури и први поведоа во 28. минута со автогол на Кивиор, но потоа следеа четири гола по ред во нашата мрежа.

Пред крајот на полувремето, Богуц и Собол донесоа пресврт за Полска (2-1), а Наровски и Баргиел на стартот на вториот дел, дадоа голови за 4-1. Бојан Колевски во 71. минута погоди за 4-2, а последниот погодок во мрежата на Полјаците падна во 88. минута и беше дело на Алекс Талески.

Македонија У19 во подготовките за квалификацискиот циклус за ЕП ја чека уште еден пријателски натпревар, против врсниците од Англија во Бирмингем.