• Мартин Танасковски
Сè поголемото намалување на гледаноста на репрезентативните натпревари за време на паузите предизвикува сериозна загриженост во редовите на Европската фудбалска унија (УЕФА). Натпреварите во рамките на квалификациите за Светското или Европското првенство, кои традиционално привлекуваа голем број навивачи, денес бележат значителен пад на интересот и пред екраните и на трибините.
Во интервју за европските медиуми, претседателот на УЕФА, Александер Чеферин, отворено зборуваше за оваа тема и потврди дека организацијата веќе работи на редизајнирање на квалификацискиот систем со цел да се врати привлечноста на репрезентативниот фудбал.
„Очигледно е дека квалификациите треба да изгледаат поинаку. Мораме да создадеме поинтересен формат, но без да го зголемуваме бројот на натпревари. Нашата цел е да донесеме решенија кои ќе ја вратат возбудата и ќе го задржат квалитетот,“ изјави Чеферин.
Иако не откри детали за потенцијалните измени, според информации блиски до УЕФА, се разгледува можноста за воведување на систем сличен на оној што се користи во Лигата на шампионите или во Лигата на нации, со групни фази кои би носеле поголем натпреварувачки интензитет и повеќе директни дуели меѓу водечките репрезентации. Целта е секој меч да има поголема тежина и спортска неизвесност, за разлика од сегашниот формат каде некои дуели се играат без голема натпреварувачка важност.
Според неофицијални најави, првите конкретни предлози за реформа на системот би можеле да бидат претставени на почетокот на 2026 година, со цел нивна можна примена пред следниот циклус квалификации за Европското првенство.
