• Мартин Танасковски
Српскиот суперлигаш Раднички реализира нов трансфер, откако го продаде македонскиот репрезентативец Лука Станковски. Играчот кој пристигна во клубот од Шумадија во 2024 година, по година и пол го напушта Крагуевац и ја продолжува кариерата во странство.
Станковски ќе го носи дресот на Колос Коваливка, тим кој сезонава бележи солидни резултати во украинскиот шампионат. Договорот меѓу фудбалерот и екипата е потпишан до 2028 година.
По 16 одиграни кола, Колос се наоѓа на шестата позиција на табелата со освоени 25 бодови и е во конкуренција за пласман во горниот дел од табелата.
Лука Станковски покрај за Раднички, во кариерата играше и за турски Газијантеп, Тузласпор, словенечка Горица, македонски Работнички. Има два настапи за сениорскиот тим на Македонија кои ги доби со добрите настапи во српската Суперлига.
