• Зоран Мишевски
Европскиот шампион Пари Сен Жермен пропушти можност за петти трофеј оваа сезона и триумфален крај на сезоната. Откако Челзи го победи ПСЖ со 3-0 во финалето на Светското клупско првенство на ФИФА, играчите имаа вербална пресметка на теренот. Тренерот на францускиот тим, Луис Енрике, го турна напаѓачот Жоао Педро. Шпанецот со рака го удри Бразилецот во грлото, а потоа и во лицето, по што напаѓачот падна на земја.
За евентуални санкции од страна на ФИФА пишува „Ле Паризиен“. Дисциплинската комисија на ФИФА ќе треба да одлучи дали да го разгледа случајот, бидејќи не беше покажан црвен картон, а ниту делегатот нема посебна постапка во официјалниот протокол.
Според член 56.2(а) од Дисциплинскиот законик на ФИФА, дисциплинската комисија „има надлежност да изрекува санкции за сериозни прекршоци кои можеби останале незабележани од судиите на натпреварот.
Во таков случај шпанскиот тренер ќе биде суспендиран со најмалку три натпревари за акт на агресија, вклучувајќи удирање со тупаница, удирање со лакт, удирање со глава, шутирање, гризење или плукање кон противник или кое било друго лице освен судијата.
Жоао Невес, кој беше исклучен заради влечење за коса на Марк Кукуреља, ризикува суспензија за Суперкупот на УЕФА против Тотенхем на 13 август.
ФОТО/PHOTO: FIFA
