• Саше Љолес
Реал Мадрид го потврди распоредот за дел од летните подготовки и објави дека на осми август ќе одигра пријателски натпревар против унгарскиот шампион Ференцварош во Будимпешта.
Тоа ќе биде една од последните проверки за тимот на Жозе Мурињо пред почетокот на новата сезона. Претходно, „кралевите“ ќе одиграат тренинг-натпревар против шпанскиот Алкоркон.
Дуелот со Ференцварош ќе се игра на „Групама Арена“, стадион на кој Реал досега нема настапувано. Сепак, Мурињо добро го познава овој терен, бидејќи во 2014 година, како тренер на Челзи, го предводеше својот тим до победа над Ференцварош на отворањето на стадионот.
Според шпанските медиуми, до тогаш на тимот треба да му се приклучат и новите засилувања Дензел Дамфрис и Бернардо Силва, кои би можеле да ги забележат првите минути во дресот на Реал токму на овој натпревар.
Интересно е што поради гостувањето на Реал, Ференцварош ќе мора да го одложи дербито од унгарското првенство против Ѓер, кое беше закажано за истиот датум. Наместо првенствен натпревар, унгарскиот шампион ќе го пречека шпанскиот гигант. Интересот за мечот веќе е огромен, иако досега нема билети во продажба. Се претпоставува дека меѓу навивачите ќе има „голема тепачка“ за да го проследат гостувањето на најтрофејниот клуб во светот.
Во меѓувреме, Реал работи и на организација на уште еден пријателски меч, а како потенцијален противник се споменува германскиот Шалке.
