• Горан Упале
Новата сезона во Лигата на шампионите започна со сензација во Загреб и очекувана победа на Борусија Дортмунд. Шампионот од пред две сезони, Челзи, и во европската елита не отвори како што се очекуваше и со минимални 1-0 загуби од мотивираниот хрватски првак, додека „милионерите“ без многу проблеми со 3-0 го совладаа тимот на Копенхаген.
- Динамо Загреб - Челзи 1-0:
На „Максимир“ премиерлигашот беше огромен фаворит, но одново ги разочара своите фанови. Фудбалерите на Томас Тухел отворија под очекувањата во Премиер лигата, а тоа го пресликаа и во Лигата на шампионите и заслужено со наведнати глави го напуштија легендарниот хрватски стадион.
Динамо Загреб, со Аријан Адеми и Стефан Ристовски во првиот состав, одигра фантастичен натпревар и доколку имаше повеќе среќа можеше да слави поубедлива победа. Првиот овосезонски гол во Лигата на шампионите падна токму во Загреб.
„Модрите“ по само тринаесет минути игра го „смрзнаа“ фаворизираниот протвиник, откако Мислав Оршиќ постигна прекрасен погодок во мрежата на лондончани. По неколку брзи додавања, Петковиќ со глава го проигра Оршиќ, а овој претрча половина терен и го совлада Кепа, за голема радост на трибините и водство од 1-0, резултат со кој се замина на одмор.
Во второто полувреме, Челзи очекувано беше подобриот ривал на теренот, но и Динамо имаше свои шанси за нов погодок. Најголемата ја пропушти Ристовски, кој од преку дваесет метри испрати „проектил“, но шпанскиот голман со врвот на прстите не дозволи еврогол на македонскиот репрезентативен капитен. Најзрелата шанса за премиерлигашот ја имаше Каи Хаверц во самата завршница, но Ливаковиќ беше концентриран и запиша атрактивна интервенција.
Во Германија, Борусија Дортмунд не виде мака против данскиот шампион Копенхаген и славеше со 3-0. Ројс по одлична тимска акција и Гереиро седум минути подоцна го шокираа Копенхаген и го отворија патот на својот тим до стартна победа.
- Борусија Дортмунд - Копенхаген 3-0:
Во вториот дел конечните 3-0 ги постави младата англиска ѕвезда Белингам, со погодок во 83. минута.
