• Саше Љолес
Во следните два дена ќе се игра четвртото коло од Лигата на шампионите. Бранителот на титулата, францускиот ПСЖ, ќе игра против Баерн Минхен во Париз, меч кој е окарактеризиран како едно од двете дербија на оваа рунда.
Вториот најважен натпревар во ова коло е оној меѓу Ливерпул и Реал Мадрид, каде екипата на Арне Слот ќе се обиде да излезе од големата криза со евентуален добар резултат против „кралевите“ од Шпанија.
Манчестер Сити в среда ја пречекува Борусија од Дортмунд, додека италијанскиот Интер ќе биде огромен фаворит на домашен терен против Каират Алмати.
ПСЖ, Баерн Минхен, Интер, Реал Мадрид и Арсенал се екипите кои имаат максимален ефект по три одиграни кола, а вреди да се истакнат одбраните на „нероаѕурите“ и „топчиите“, кои досега не примија ниту еден гол.
Арсенал ќе гостува кај незгодната Славија Прага, но во секој случај, навивачите ќе очекуваат уште една победа во елитното натпреварување.
