• Саше Љолес
Франкфурт доби големо признание од европскиот фудбал - легендарниот стадион „Deutsche Bank Park“ е избран за домаќин на финалето на Лигата на Европа во 2027 година. Ова е еден од најзначајните настани што некогаш му биле доделени на градот и претставува потврда за квалитетот, инфраструктурата и организациските капацитети на арената.
Стадионот, кој има капацитет од речиси 60.000 гледачи, е познат по модерната архитектура и по уникатната околина, сместен во голем шумски парк што му дава посебна атмосфера. Со години е дом на Ајнтрахт Франкфурт и редовно е домаќин на големи мечеви, но финалето во 2027 ќе биде историски момент кој го поставува меѓу најелитните европски стадиони.
Градот веќе се подготвува за големиот спектакл. Очекувања се дека десетици илјади навивачи ќе пристигнат од цела Европа, што ќе донесе економски бенефити, исполнети хотели, преполни улици и вистинска фудбалска еуфорија. Франкфурт планира проширување на логистичката поддршка, транспортот и придружните активности за да пречека навивачи, екипи и медиуми на највисоко ниво.
Со изборот на Deutsche Bank Park за финале, Германија уште еднаш потврдува дека е еден од најорганизираните домаќини на големи фудбалски натпреварувања.
