• Саше Љолес
Аргентинскиот тренер и поранешен славен фудбалер, Хернан Креспо, повеќе не е тренер на бразилскиот Сао Паоло, откако клубот официјално ја заврши соработката со него и неговиот стручен штаб.
Во својот прв мандат на клупата, Креспо ја освои титулата во шампионатот на сојузната држава, а во клубот се врати на 18 јуни минатата година. Оттогаш забележа 21 победа, седум нерешени средби и 18 порази.
Од Сао Паоло најавија дека клубот го напушта и тимот на Креспо, а името на новиот тренер треба да биде објавено наскоро.
Клубот во овогодинешниот плеј-оф загуби во полуфиналето, каде беше поразен од Палмеирас со 1-2, додека во првенството на Бразил се наоѓа на второто место, со десет бодови од четири одиграни натпревари.
