• Саше Љолес
Шпанската фудбалска асоцијација ги извлече двојките за полуфиналните дуели од Купот на Кралот. Четири екипи ќе се борат за вториот најважен трофеј, а меѓу нив е и Мајорка, која на хартија делува како аутсајдер во оваа конкуренција.
Поранешниот тим на нашиот Александар Трајковски во полуфиналето ќе се соочи со незгодниот Реал Сосидад, додека дерби-пресметката ќе биде помеѓу Атлетико Мадрид и Атлетик Билбао.
Шпанските медиуми најголеми шанси им даваат на „јорганџиите“ на Диего Симеоне, но Купот е непредвидливо натпреварување и тука секогаш се можни големи изненадувања. Минатогодишен освојувач на овој трофеј е екипата на Реал Мадрид, но „кралевите“ испаднаа во осминафиналето, каде беа елиминирани од најлутиот градски ривал.
