• Зоран Мишевски
Реал Мадрид го оствари најдобриот старт во националното првенство во новиот милениум. По три гостински победи, шампионот на Примера го совлада Бетис со 2-1 (1-1) на домашен терен и сам загосподари на првото место во пресрет на преостанатите седум натпревари од ова коло. Клубот од Андалузија првпат е поразен оваа сезона, иако остави одличен впечаток во главниот град.
- Реал Мадрид - Бетис 2-1:
Дуелот започна во голем стил, со офанзивни акции на двете страни и два гола во првиот половина час. Најнапред, Винициус Жуниор уште во деветтата минута го најде патот до мрежата на гостите и донесе радост на „Сантијаго Бернабеу“ (1-0). Сепак, брзо возврати тимот на Пелегрини и поранешниот „крал“ Каналес го матира Куртоа за 1-1 на полувреме.
И Анчелоти и Пелегрини тргнаа по трите бода и индивидуалните квалитети беа решавачки во овој изедначен дуел. На средина од второто полувреме Родриго го матира гостинскиот голман Силва и донесе четврта победа за шампионот (2-1).
- Мајорка - Џирона 1-1:
Попладнево на Балеарските острови, Мајорка и Џирона играа без победник, 1-1. Поведе домаќинот со голот на Раиљо во 87. минута, но длабоко во судиското надополнување Самуел Саиз донесе бод за гостите од Каталонија.
- Селта - Кадиз 3-0:
Синоќа во Виго, Селта го совлада Кадиз со 3-0, со головите на Јаго Аспас (два гола) и Мигуел Видал.
Вечерва се играат два дерби натпревари од четвртото коло: Реал Сосиедад – Атлетико Мадрид и Севиља – Барселона.
