• Саше Љолес
Антонио Конте не беше задоволен по ремито на Наполи против Џенова во 36. коло на Серија А, истакнувајќи дека чувствува огорченост и разочарување за конечниот епилог од мечот.
„Партенопеите“ направија мал кикс и му дозволија на Интер да се доближи на само еден бод во шампионската трка, а Конте смета дека на мечот со Џенова неговиот тим заслужил да го освои целиот плен.
„Чувствувам огорченост и мал гнев, но ја прифаќам ситуацијата. Имавме мал „бонус“ во однос на Интер, но сега сите карти се отворени. Мислам дека заслуживме да победиме, Џенова шутна двапати кон голот и успеа да погоди.
Во фудбалот има и вакви мечеви, некогаш имате иницијатива, шанси, добра игра, но едноставно резултатот не оди во ваша полза. Мораме да се фокусираме на следниот меч, мисијата не е остварена и ќе се бориме до самиот крај“, изјави Конте.
Во следното коло Наполи ќе гостува кај Парма, додека Интер ќе се сретне во дерби меч против Лацио на „Џузепе Меаца“.
