• Горан Упале
Фудбалерите на Милан по неверојатен пресврт го совладаа Јувентус во полуфиналето од Суперкупот на Италија со 1-2 и против градскиот ривал Интер ќе се борат за првиот овосезонски трофеј во италијанскиот фудбал.
Португалскиот стратег Серџо Консеисао на тој начин со победа ја започна својата ера во Милан, а по натпреварот истакна дека на „Сан Сиро“ не пристигна да се дружи, туку да победува.
„Во животот ви треба страст. Фудбалот е страст, емоција. Ова се убави моменти. Моите момци ја заслужија победа, заслужија да играат финале. Во првото полувреме не бевме на ниво и моравме да менуваме. На полувреме разговаравме и се гледавме во очи. Фудбалерите мора да разберат што да направат за да победат на овој натпревар. Требаше само да го направат тоа што го договоривме, а доколку загубевме со два-три разлика, јас ја преземам вината.
Работам со многу квалитетна група. Фудбалерите ја прифатија пораката и добија тренер кој не се смее многу. И баш тоа ме прави среќен, бидејќи не сум тука да се дружам, туку да победувам. Тоа е најважното“, рече новиот тренер на Милан.
Финалето меѓу миланските гиганти е закажано за понеделник, со почеток од 20:00 часот.
