• Сашо Поповски
Јирген Клоп одби да каже дека Ливерпул е во криза, иако резултатите во новата сезона го покажуваат токму тоа. На последниот меч на домашен терен, „црвените“ одиграа 3-3 против Брајтон.
Минатогодишниот вицешампион има две победи, пораз и дури четири реми средби. Проблематична е одбраната, што може да се види по гол-разликата на екипата на Клоп во новата сезона.
„Не сакам да го кажам тоа што сите сакаат да го слушнат. Имаме само десет поени и тоа е реалноста. Мора да работиме заедно и да го надминеме овој период, за да бидеме подобри во остатокот од сезоната. Се наоѓаме под притисок, не го игнорираме тоа. Момците можат да играат подобро, а моја работа е да им овозможам решенија за да го направат тоа“, порача предводникот на Ливерпул.
Тимот од „Енфилд“ моментално стои на единаесет бода помалку во однос на лидерот во Премиер лигата, Арсенал.
