• Мартин Танасковски
Фудбалерите на Ријека беа поразени на домашен терен од Стразбур со 1-2 во првиот натпревар од осминафиналето во Конференциската лига на УЕФА, па францускиот тим со минимална предност ќе го дочека реваншот што следната недела ќе се одигра во Франција.
- Ријека - Стразбур 1-2:
Дуелот на стадионот „Рујевица“ започна шокантно за хрватскиот претставник. Гостите од Франција поведоа уште во втората минута кога Хоакин Паничели одлично се снајде во шеснаесетникот и со прецизен удар покрај десната статива ја затресе мрежата на домашниот голман за рано водство на Стразбур. Францускиот состав можеше многу брзо да ја зголеми предноста. Во десеттата минута повторно се закани Паничели, кој по одбиена топка шутираше силно, но топката заврши во пречката, па Ријека остана во игра. До крајот на првото полувреме натпреварот се одвиваше во цврст ритам со многу борба на средината од теренот, а судијата покажа жолти картони за Хабиб Диара Дукуре кај гостите и за Тони Фрук кај домашниот тим.
Во продолжението Стразбур повторно беше поопасен и имаше иницијатива. Во 64. минута Себастијан Нанаси успеа да ја испрати топката во мрежата, но погодокот беше поништен поради офсајд, па резултатот остана непроменет. Сепак, гостите дојдоа до втор гол во 72. минута. По една одбиена топка во шеснаесетникот, најбрзо реагираше Марсијал Годо, кој со силен удар ја испрати топката зад гол-линијата и му донесе предност од два гола на францускиот тим. Ријека не се предаде и брзо успеа да ја намали разликата. Само четири минути подоцна, Тијаго Дантас изведе прецизен слободен удар, а Мајсторовиќ највисоко скокна на работ од петерецот и со удар со глава ја насочи топката покрај стативата за 1-2.
Во последните минути домаќинот притискаше во обид да стигне до израмнување, но одбраната на Стразбур остана стабилна и успеа да ја сочува предноста до крајот на натпреварот.
- Самсунспор - Рајо Ваљекано 1-3:
- Лех - Шахтјор 1-3:
- АЗ Алкмар - Спарта Прага 2-1:
Во останатите натпревари од истиот термин во Конференциската лига исто така имаше интересни пресметки. Самсунспор, кој ја исфрли Шкендија од Европа, на свој терен беше поразен од Рајо Ваљекано со 1-3, АЗ Алкмар славеше против Спарта Прага со 2-1, додека Шахтјор Доњецк како гостин беше поуспешен од Лех Познањ и победи со 3-1.
