• Горан Упале
Капитенот на англиската репрезентација, Хари Кејн, со два погодоци ја предводеше својата селекција до победа од 4-2 против Хрватска на стартот од Светското првенство, но и покрај одличниот настап, не изостанаа критиките.
Поранешниот германски репрезентативец Дитмар Хаман смета дека напаѓачот на Баерн Минхен сè уште има што да докажува во најважните натпревари.
Кејн двата гола ги постигна во првото полувреме. Прво од пенал, а потоа и со прецизен удар со глава за водство на Англија. Во вториот дел, тимот на Томас Тухел ја завери победата со головите на Џуд Белингем и Маркус Рашфорд.
Иако Кејн беше прогласен за играч на натпреварот и се израмни со рекордот на Гери Линекер со десет гола за Англија на Мундијалите, Хаман не е импресиониран.
„Тој е капитен и мора да погодува во нокаут фазата. Сакам да го видам тоа против Франција или Бразил. Дали е способен – допрва ќе видиме“, изјави Хаман.
Германецот додаде дека учинокот на Кејн во Баерн не е вистинско мерило, потенцирајќи дека во Минхен „секој напаѓач постигнува многу голови“, и изрази сомнеж дали Англичанецот ќе може да создава шанси против најсилните репрезентации.
Сепак, вреди да се напомене дека Кејн веќе има голови и во нокаут фазите од претходните турнири, вклучувајќи настапи на Европското првенство 2024 и Светското првенство во Катар.
